ຄວາມເປັນມາຂອງກອງທຶນສົ່ງເສີມການສຶກສາບາລີພຸດທະວົງສ໌

ກອງທຶນສົ່ງເສີມການສຶກສາບາລີພຸດທະວົງສ໌

1. ຄວາມເປັນມາ

ພາສາບາລີ ຫຼື ພາສາມະຄົຕເປັນພາສາທີ່ອົງຄ໌ສົມເດັດພຣະສັມມາສັມພຸດທະເຈົ້າຊົງໃຊ້ປະກາດ ພຣະພຸດທະສາສະໜາ ພາຍຫຼັງຕໍ່ມາບູຮານບັນດິດໄດ້ໃຊ້ເປັນພາສາຕົ້ນແບບໃນການບັນທຶກພຣະທັມ ຄຳສັ່ງສອນຂອງພຣະບໍຣົມມະສາດສະດາໃນຮູບແບບຂອງຄຳພີພຣະໄຕຣປິດົກ ອັຕຖະກະຖາ ແລະ ດີກາ ເພື່ອໃຫ້ອະນຸຊົນຄົນພາຍຫຼັງໄດ້ສຶກສາຄົ້ນຄວ້າແລ້ວນຳໄປປະພຶດປະຕິບັດ.

ດ້ວຍເຫດທີ່ຄຳສອນທາງພຸດທະສາດສະໜາໄດ້ລິດຈະນາຈາລຶກຂີດຂຽນໄວ້ເປັນພາສາບາລີລວມທັງພຣະໄຕຣປິດົກ ອັດຖະກະຖາ ແລະດີກາກໍຈານຈາລຶກເປັນພາສາບາລີ ຕະຫຼອດຈົນຄຳພີວ່າດ້ວຍ ກົດທາງໄວຍາກອນຂອງພາສາບາລີທີ່ສຳຄັນເຊັ່ນ ຄຳພີກັດຈາຍະ, ຄຳພີປະທະຣູປະສິດທິ ແລະຄຳພີ ສັດທະນີຕິໄວຍາກອນ ເປັນຕົ້ນ ກໍຍັງບໍ່ໄດ້ຮັບການແປເປັນພາສາລາວ ສ່ວນການຮຽນການສອນກໍ ຍັງບໍ່ປາກົດມີຂຶ້ນໃນປັດຈຸບັນ ຈຶ່ງຍາກຕໍ່ການສຶກສາຄົ້ນຄວ້າຂອງຄົນໃນຍຸກນີ້ ເຮັດໃຫ້ຊາວພຸດບາງກຸ່ມ ເຂົ້າໃຈເນື້ອຫາຫຼັກທັມທາງພຣະພຸດທະສາດສະໜາບໍ່ທົ່ວເຖິງແລະນຳມາເຊິ່ງການປະຕິບັດທີ່ບໍ່ຖືກຕ້ອງ ຕາມຫຼັກທັມວິນັຍ

ດັ່ງນັ້ນ ໃນປີ 2013 ກອງທຶນສົ່ງເສີມການສຶກສາບາລີພຸດທະວົງສ໌ໄດ້ກໍ່ຕັ້ງຂຶ້ນ ໂດຍພຣະ ປັນດິຕາຈາຣຍ໌ ແຮ່ສະຫວັນ ສີລາຈັນທຣ໌ ດ້ວຍການລະດົມທຶນຮອນແລະພຣະສົງສາມະເນນທີ່ມີສັດທາ ແລ້ວສົ່ງໃຫ້ໄປສຶກສາປະຣິຍັດຕິທຳສາຍທຳມະບາລີ ທີ່ປະເທດພະມ້າແລະໄທ ໂດຍເນັ້ນການຮຽນບາລີ ສາຍກັດຈາຍະນະໄວຍາກອນ ເພາະເປັນຮູບແບບ ການຮຽນທີ່ເກົ່າແກ່ທີ່ສຸດຂອງພຸດທະສາດສະໜາ ຝ່າຍເຖຣະວາດ ໂດຍສະເພາະໃນປະເທດສີລັງກາ ແລະພະມ້າໄດ້ຍຶດເປັນຮູບແບບການຮຽນມາຈົນເຖິງ ທຸກວັນນີ້ ທັງນີ້ເພື່ອຍັງປະໂຫຍດໃຫ້ເກີດຂຶ້ນຕໍ່ພຣະພຸດທະສາດສະໜາໃນລາວສືບໄປພາຍພາກໜ້າ

2. ວັດຖຸປະສົງ

ເພື່ອສ້າງພຣະສົງສາມະເນນໃຫ້ມີຄວາມຮອບຮູ້ວີຊາການທາງພຸດທະສາສະໜາ

ເພື່ອສຸ່ມໃສ່ການກໍ່ຕັ້ງສູນກາງການສຶກສາວິຊາການທາງພຸດທະສາສະໜາໃນເຂດພາກເໜືອ

ເພື່ອກຽມພ້ອມກ່ອນຈະແຕ່ງແປຄຳພີທີ່ສຳຄັນທາງພຸດທະສາສະໜາ

3. ຜູ້ດຳເນີນການ

 ພຣະອາຈາຣຍ໌ແຮ່ສະຫວັນ ປັນດິໂຕ ປະທານກອງທຶນບາລີພຸດທະວົງສ໌

 ພຣະອາຈາຣຍ໌ແສງມະນີ ເພັງພອນທິບ ຮອງປະທານກອງທຶນບາລີພຸດທະວົງສ໌

 ພຣະອາຈາຣຍ໌ຄຳຫລ້າ ສາຣະປຸນໂຍ ຮອງປະທານກອງທຶນບາລີພຸດທະວົງສ໌

4. ກຸ່ມເປົ້າໝາຍ

ພຣະພິກຂຸສົງສາມະເນນທີ່ມີຄວາມສົນໃຈສຶກສາຫຼັກທັມໃນພຣະພຸດທະສາສະໜາ

5. ວິທີ່ດຳເນີນການ

ຫຼັງຈາກຕິດຕໍ່ສຳນັກຮຽນ ແລະປະກອບເອກະສານໜັງສືຜ່ານແດນ (PASSEPORT) ຖືກຕ້ອງ ຕາມຂັ້ນຕ້ອນແລ້ວ ຈາກນັ້ນຈັດສົ່ງພຣະສົງສາມະເນນທີ່ມີຄວາມຕັ້ງໃຈໃຫ້ເດິນທາງໄປສຶກສາພຣະປະຣິ ຍັດຕິທຳຕາມວັດຕ່າງໆ ທີ່ກຳໜົດໄວ້

6. ສຳນັກຮຽນໃນເຄື່ອຂ່າຍ

1) ວັດມະໂຊເຢັນ (Ma so yein) ຍ່າງກຸ່ງ (ປະເທດສະຫະພາບມຽນມ້າ)

2) ວັດໂມລີໂລກະຍາຣາມ ກຸງເທບມະຫານະຄອນ (ປະເທດໄທ)

3) ວັດຈາກແດງ ແຂວງສະໝຸດປາການ (ປະເທດໄທ)

4) ວັດທ່າມະໂອ ແຂວງລຳປາງ (ປະເທດໄທ)

5) ວັດພຣະທາດສີຈອມທອງ ແຂວງຊຽງໃໝ່ (ປະເທດໄທ)

7. ປະໂຫຍດທີ່ຈະໄດ້ຮັບ

 ສາມາດເຂົ້າໃຈເນື້ອຄວາມບາລີພຣະໄຕປິດົກ ແລະອັດຖະກະຖາ ຕາມພຸດທະປະສົງ

 ເຮັດໃຫ້ມີຄວາມພ້ອມທີ່ຈະແຕ່ງແປຕຳລາໄວ້ເປັນມໍລະດົກທັມໃນພຸດທະສາສະໜາ

 ໄດ້ສາສະນະທາຍາດທີ່ມີຄວາມຮູ້ພ້ອມທັງປະຣິຍັດແລະປະຕິບັດ

8. ສະຖານທີ່ຕິດຕໍ່

ປະທານກອງທຶນສົ່ງເສີມການສຶກສາບາລີພຸດທະວົງສ໌

ພຣະປັນດິຕາຈາຣຍ໌ ແຮ່ສະຫວັນ ສີລາຈັນ

ວັດທາດສຸວັນນະຜ້າຄຳ ເມືອງຫ້ວຍຊາຍ ແຂວງບໍ່ແກ້ວ

ໂທລະສັບເບີລາວ 02099938981 ເບີໄທ 0873012007

--------

ພາບບາງຕອນໃນໂຄງການ

About ສຽງທັມvoice

This is a short description in the author block about the author. You edit it by entering text in the "Biographical Info" field in the user admin panel.